As festas na honra á Virxe do Carme son a celebración máis importante da parroquia de Entrambosríos e soen festexarse a segunda semana do mes de agosto, a pesares de que o día do Carme é o 16 de xullo. Isto débese a que antigamente os mozos da parroquia marchaban traballar ás segas a Castela, polo que non estaban para a festa e moitas das celebracións que coincidían nos meses de xuño e xullo foron trasladadas ó mes de agosto.
Así, ó longo desta semana do mes de agosto a parroquia celebra as súas festas patronais nas que teñen cabida todo tipo de actividades: velada de teatro a cargo dos veciños, torneo de baloncesto, campionato de tute, cea popular, alborada e sesión vermú con charanga, verbenas con grupos, disco móbil,…
