Balance económico festa das Neves Zarracós 2023

As contas presentan un saldo positivo de +102,54€

 

Nas imaxes axuntas a este artigo podedes acceder ás contas da festa das Neves Zarracós 2023, así como, ó listado de donativos da mesma. Tal e como se pode comprobar, estas arroxan un saldo POSITIVO de +102,54 € que se ingresarán na conta bancaria da asociación de veciños,  a falta dunha cota por cobrar.

Este ano a recadación foi superior á do ano 2022 (173,10€ máis), logrando xuntar a extraordinaria cifra de 11.052,10€, cantidade realmente excepcional  sobre todo tendo en conta os tempos tan complicados que estamos vivindo. Así mesmo, grazas a axustar o orzamento da festa a cifras similares as celebracións anteriores á pandemia,  foi posible acadar uns escasos beneficios, pero beneficios ó fin é ó cabo.

Se analizades un pouco nas contas, poderedes comprobar que cada vez hai menos cotas, este ano soamente se cobraron 61 o que supón 3 menos que o ano 2022. Pola súa banda os donativos e a venda de rifas son os ingresos que actualmente están axudando a soster a festa.

A Xunta Directiva da Asociación de Veciños San Andrés de Zarracós quere dar as grazas:

• A todos os veciños desta parroquia pola súa excepcional colaboración, tanto económica como doutro tipo, máxime, nestes tempos tan difíciles que estamos a vivir.
• A todos aqueles veciños da parroquia, así como doutras parroquias, que achegaron diñeiro a maiores.
• A todas aquelas persoas que mercaron rifas para o sorteo dos 300 €, así como, a aqueles que axudaron a vendelas desinteresadamente.
• A todas aquelas persoas que mercaron rifas para o sorteo do Nadal.
• A todos os establecementos e marcas comerciais que contribuíron anunciándose nos carteis ou simplemente dando diñeiro sen  ningún tipo de contrapartida.
• Ós compoñentes do Grupo de acordeóns Bieito Blanco, por deleitarnos coa súa gran profesionalidade e animar a festa do venres, mención especial a Bieito Blanco que a maiores tamén ensaiou o coro parroquial.
• Ós veciños que botando man dos seus instrumentos e das súas voces se prestaron para cantar a misa ou animar a queimada de fin de festa.
• A todos os colaboradores que axudaron a levar a cabo os xogos infantís, as olimpíadas e todos os traballos necesarios para levar a bo porto a festa deste ano, mención especial a xuventude que este ano se implicou de verdade.
• A todos aqueles que participaron nos distintos torneos celebrados con motivo da festa: chave, fútbol e tute.
• A Ivette Bordera, Maricarmen Peña, Ángel Vento e Nuria Erre Pe por colaborar para facer realidade a I Exposición de Arte Local.

Grazas a todos e cada un de vos as festas de Zarracós son o que son

Dende a Asociación de Veciños agardamos que esta festa, cos seus erros e cas súas virtudes, fose do agrado da maioría de todos vos.

Finalmente, destacar que este ano a xuventude implicouse na festa e é algo para agradecer, pero pedimos que ese espírito de colaboración non morra e que cada ano se vaian animando máis e máis a participar na organización para non deixar morrer esta festa, pois as forzas dos que neste momento asumimos o maior peso van indo bastante xustas.