Grande acollida do documental -A última viaxe do afiador-

O local socio-cultural de Zarracós ateigouse para disfrutar da proxección deste filme con selo ourensán

A pesares das inclemencias meteorolóxicas e de ser un día laborable para meirande parte da xente, o local socio-cultural de Zarracós colgou o cartel de repleto e preto de oitenta persoas se deron cita para gozar da proxección do filme A última viaxe do afiador da produtora ourensá Boneca Lareta.

Así, tras unha breve presentación a cargo do director do filme, Aitor Rei, os asistentes puideron emocionarse e rir a esgalla coas peripecias destes heroes anónimos que un día decidiron saír polo mundo adiante para buscarse a vida coa única axuda dunha roda afiar. Historias e vivencias reais coas que o público presente se identificou, pois por sorte ou desgraza, nesta nosa provincia unha gran parte da poboación se tivo que ir fora para poder subsistir e sacar adiante as súas familias.

No lugar tamén puido ser admirada unha pequena mostra de rodas de afiar (procedente do museo Florencio de Arboiro) composta por cinco pezas, dende a máis antiga con ao redor de 200 anos no seu haber a outras máis modernas montadas en bicicletas ou nunha moto. Esta exposición reflexa a evolución deste oficio hoxe case desaparecido.

Dende a Asociación de Veciños de Zarracós queremos expresar o noso máis profundo agradecemento a todo o equipo de Boneca Lareta que se desprazou ata Zarracós polo excelente trato ofrecido e por facilitar a unha entidade tan humilde como a nosa poder levar a cabo unha actividade cultural de tanta calidade. Así mesmo, tamén queremos darlle as grazas por cedernos as fotografías que forman parte da galería e que podedes ver pulsando no seguinte enlace.

Pulsa aquí para ver a galería do cinema de verán 2015

Agardamos que esta actividade fose do agrado da maioría e que en vindeiras ocasións se poidan seguir realizando novas propostas culturais que lle dean valor ao noso rural.