Os nosos camiños rescatados do esquecemento

Un auténtico tesouro natural e etnográfico diante dos nosos ollos

Ó longo destas últimas semanas os operarios do Obradoiro de Emprego do Concello de A Merca estiveron, e están, limpando moitos dos camiños que vertebraron e comunicaron a nosa parroquia coas limítrofes durante lustros. Hoxe puidemos ir dar unha boa volta por eles e aquí vos deixamos unhas cantas fotos e algunha que outra reflexión persoal.

Moitos destes vieiros: Chelos, Ouladradia, Outeiro Da Fora, Arrotea, ....  levaban anos “cegos” e esquecidos, sen que nada nin ninguén máis que a fauna salvaxe transitase por eles, sen que ninguén lles dese o máis mínimo valor sentimental ou doutro tipo, invisibles ante os nosos ollos. A miúdo, tendemos a pensar que o noso monte e a nosa paisaxe non valen nada, que o dos outros sempre é mellor e que no noso soamente hai silvas, xestas, mimosas, etc... pero esquecémonos de que vivimos nun lugar privilexiado e que temos un auténtico tesouro natural e etnográfico diante dos nosos ollos: soutos, carballeiras, pozas, fontes, sorreiras corredoiras, canellas, canastros,... soamente nos queda aprender a valoralo, a desfrutalo e a coidalo, por que o monte queimado si que non vale nada.

Hoxe, aproveitando a ocasión que nos brinda dispor deste fermoso medio de comunicación, queremos animarvos a que, cando dispoñades dun pequeno oco, vos peguedes unha camiñada por algún destes sendeiros. De seguro, que moitos recordaredes a vosa infancia e outros descubriredes un novo horizonte ó carón das nosas aldeas.

A continuación deixámosvos unha galería de fotos da andaina de hoxe para que vos fagades unha idea de todo o relatado en parágrafos anteriores, pero, non perdades a oportunidade de admirar este paisaxe en vivo.